KNK: Girtina siyasetmedarên Kurd fişar û bêbaweriyê zêde dikin

News articles are in Kurmanji Kurdish
Konseya Rêveber a KNK’ê bi daxuyaniyekê girtin û binçavkirina siyasetmedarên Kurd şermezar kir.
Di daxuyaniya Konseya Rêveber a Kongreya Neteweyî ya Kurdistanê (KNK)de wiha hat gotin:
"Em weke Kongreya Neteweyî ya Kurdistanê (KNK), girtin û binçavkirina siyasetmedarên Kurd bi awayekî tund şermezar dikin û vê yekê weke binpêkirina mafên siyasî, azadiya raman û mafê demokratîk dinirxînin.
Girtin û zextkirina siyasetmedarên Kurd ji ber helwest, raman û xebatên wan ên siyasî, ne rêya çareserkirina pirsgirêkên gelê Kurd bi awayekî siyasî û aştiyane ye.
Ev cure kiryar tenê zext û bêbaweriyê zêde dikin û rê li ber diyalog û çareseriyên pirsa gelê Kurd digirin."
KNK bang li Tirkiyê kir mafên rewa yên siyasetmedarên Kurd nas bike
Her wiha KNK bang li desthilatdarên dewleta Tirk kir ku mafên rewa û bingehîn ên demokratîk û siyasî yên siyasetmedarên Kurd bê kêmahî nas bikin.
Di berdewamiya daxuyaniyê de KNK’ê ev yek anî ziman:
"Şêwazên girtina siyasetmedarên Kurd bi ti rengî nayê qebûlkirin û pêwîst e demildest bê şert û merc bên berdan.
Em bang li hemû sazî, rêxistin û hêzên demokratîk dikin ku li hemberî binpêkirinên mafên siyasî û demokratîk ên gelê Kurd bêdeng nemînin û ji bo çareserkirina pirsgirêkan gavên pêwîst biavêjin."
"Em bang li hêz û aliyên siyasî yên Kurdistanê dikin ku mafên gelê Kurd biparêzin"
KNK’ê diyar kir ku ew di vê demê de bang li hemû hêz, partî û aliyên siyasî yên Kurdistanê dike ku ji bo parastina mafên gelê Kurd, li dijî hemû şêwazên zext û zordestiyê helwesteke hevpar nîşan bidin.
Di heman demê de KNK’ê diyar kir ku pêwîst e yekîtiya neteweyî û hevrêziya siyasî demildest pêk bê.
Di dawiya daxuyaniyê de KNK’ê da zanîn ku azadî û demokrasî bi zext û girtinan nayên bêdengkirin û mafên siyasî û demokratîk divê bên parastin.




